सोनिया गान्धी फेरि सङ्क्रमित नयाँ दिल्ली, २८ साउन (रासस÷एएनआई) – भारतीय राष्ट्रिय काङ्ग्रेसकी अन्तरिम अध्यक्ष सोनिया गान्धी फेरि सङ्क्रमित हुनुभएको छ । उहाँ कोरोना भाइरसबाट अहिले दोस्रो पटक सङ्क्रमित हुनुभएको हो । उहाँ यसअघि गत जुन २ मा पनि कोरोना भाइरसबाट सङ्क्रमित हुनुभएको थियो । उहाँमा सङ्क्रमण रहेको शनिबार पुष्टि गरिएको अधिकारीहरूले जनाएका छन् । उहाँलाई कुनै ठूलो स्वास्थ्य समस्या भने नरहेको बताइएको छ । नेतृ गान्धी अहिले कोरोना भाइरस नियन्त्रण सम्बन्धी नियम अनुसार घरमा छुट्टै बस्नु भएको कांग्रेस नेता जयराम रमेशले जानकारी दिनुभयो । उहाँलाई परिवार भित्रैबाट सङ्क्रमण सरेको अनुमान गरिएको छ । उहाँकी छोरी तथा पार्टीकी महासचिव प्रियङ्का गान्धी भद्रालाई सङ्क्रमण भएको गत बुधबार पुष्टि गरिएको थियो । सोनियाका छोरा तथा पार्टीका पूर्व अध्यक्ष राहुल गान्धी पनि बिरामी हुनुभएको छ । उहाँ सहभागी हुने तय गरिएका कतिपय कार्यक्रम पनि स्थगित गरिएका छन् । भारतमा पछिल्लो समय कोरोना भाइरसबाट दैनिक सङ्क्रमितहरूको सङ्ख्या बढ्दै गएको देखिएको छ ।रासस
प्रतिक्रिया दिनुहोस्