लीलाध्वज थापा साहित्य प्रतिष्ठानले प्रा गोपीकृष्ण शर्मालाई लीलाध्वज थापा साहित्य सम्मान तथा पुरस्कार प्रदान गरेको छ । शिक्षण पेशाका माध्यमबाट नेपाली भाषा साहित्यको श्रीवृद्धिमा लामो समयदेखि योगदान गरेवापत शर्मालाई उपन्यासकार लीलाध्वज थापाको १०२औँ जन्मजयन्तीको अवसरमा रु २५ हजार राशिद्वारा पुरस्कृत गरिएको हो । पुरस्कृत शर्माले करिब चार दशकदेखि नेपाली भाषा तथा साहित्यमा योगदान दिनुभएको छ । नेपाल प्रज्ञा प्रतिष्ठानका उपकुलपति डा जगमान गुरुङले उपन्यास, नाटक, कथा, कविता सिर्जना गरी समाजलाई चेतनशील बनाउन स्व थापाले महत्वपूर्ण भूमिका निर्वाह गरेको बताउनुभयो । सोही प्रतिष्ठानका सदस्य सचिव प्रा जगतप्रसाद उपाध्यायले थापाका कृतिलाई संरक्षण गर्नका लागि केही कृति प्रज्ञा प्रतिष्ठानले प्रकाशनका साथै बिक्री वितरण गरेको जानकारी दिनुभयो । बीके पाल्पलीले लेख्नुभएको ‘लीलाध्वज थापा’ जीवनी काव्य, सरिता केसीले लेख्नुभएको ‘विजयध्वज थापा व्यक्ति र कृति’ साथै विजयध्वज थापाले लेख्नुभएको ‘रहस्य गहिरो छ’ मुक्तक संग्रहको लोकार्पण गरिएको कार्यक्रममा रेणुका भट्टराई तथा सरिता केसीलाई दोसल्ला ओढाइ सम्मान गरिएको थियो । विसं २०१४ मा थापाको ‘मन’ उपन्यासले मदन पुरस्कार प्राप्त गरेको थियो भने ‘शान्ति’ र ‘पूर्वस्मृति’ उहाँका चर्चित उपन्यास हुन् । उहाँका ‘अमर माया’ नाटक तथा बालसाहित्यतर्फ ‘दारी’ व्यङ्ग्य निबन्ध, खण्डकाव्यमा ‘सबैका लागि’ र ‘सधैँका लागि’ साथै कथा, कविता प्रकाशित छन् । प्रतिष्ठानका अध्यक्ष विजयध्वज थापाले विभिन्न साहित्यिक गतिविधि सञ्चालन गरिरहेको प्रतिष्ठानले नेपाली भाषा, साहित्य तथा बाङ्मयका क्षेत्रमा खोज अनुसन्धान गर्ने स्रष्टालाई समेत पुरस्कार प्रदान गर्दै आएको जानकारी दिनुभयो ।।रासस